O Festival Primavera do Cine en Vigo presentou o cartel oficial da que será a súa VI Edición

O Festival Internacional Primavera do Cine de Vigo celebrará unha master class impartida polo cineasta galardoado con dous Goyas, Alberto Vázquez.

  • A entidade organizadora, Reencanto Produccións, presentou onte o cartel da VI Edición do certame
  • O Festival contará coa presenza do cineasta angoleño, Zeze Gamboa, de proxección internacional
  • A decisión da Xunta de Galicia de retirar a axuda económica por un «erro de forma» está cifrada nunha merma de 9.000 euros de orzamento.

¡O programa estará na nosa web!

A organización do Festival Primavera do Cine en Vigo presentou esta mañá, na Fundación Sales, o cartel oficial da que será a súa VI Edición consecutiva. A peza deseñada pola profesional viguesa, María Llauger, pretende plasmar a esencia do cinema nunha composición que vai do abstracto ao figurativo. A primavera, as cores e o cinema cobran vida nun cartel que ten, en palabras da artista, «vontade de conectar con nenos e adultos por igual». O certame, terá lugar entre o 5 e o 14 de maio na cidade olívica. A A.C. Reencanto Produccións, como entidade organizadora, en colaboración co Concello de Vigo e o Instituto Camoes, anunciou a ampliación da oferta cultural do evento que contará coa presenza de cineastas de recoñecemento internacional coma o angoleño, Zeze Gamboa ou a master class do galardoado con dous premios Goya, Alberto Vázquez.

O FINANCIAMENTO
O pasado martes a Xunta de Galicia anunciaba a retirada das axudas ao Festival Primavera do Cine, Cans, Curtocircuito, Cineuropa e Freakemacine por un erro de forma na presentación da documentación solicitada polo Agadic. O director do Primavera do Cine, Juan de Castro, subliñou que hai presentado un recurso formal xa que «trataron de presentar vía telemática a documentación e había un erro no sistema informático». Era o primeiro ano que a solicitude de axudas debía ser realizada por procedemento online de xeito obrigatorio. Trala reunión da dirección co Presidente de Agadic, Jacobo Sutil, o Festival Primavera do Cine terá que agardar a que AMTEGA dirima «se o erro foi da plataforma ou dos solicitantes». A situación actual depende, en boa medida, desta decisión xa que o orzamento do evento viuse reducido en 9.000 euros e obrigaría a unha «merma nas actividades». De Castro amosaba a súa inquedanza pola actitude dunha institución que ten a «obriga e velar por este tipo de acción culturais» e anuncia unha resposta conxunta por parte dos festivais que conforman a Coordinadora de Festivais de Cinema de Galicia xunto con outros organismos do audiovisual. O Festival Primavera do Cine convidou ao Concello a defender o «festival máis grande que ten a súa cidade».

O FESTIVAL
O certame manterá, na presente edición, as súas tres categorías orixinais: curtametraxe, longametraxe e videoclip. Ademais, por segundo ano consecutivo e con intención de permanencia, o festival engadirá categorías de competición para filmes de países lusófonos. Nesta liña, o festival contará coa asistencia do cineasta angoleño, Zeze Gamboa, que presentará a súa longametraxe de máis recoñecemento, O grande Kilapi. Como principal novidade, este ano o festival contará cun xurado internacional formado por profesionais do sector audiovisual que concederá o premio do xurado ás mellores longametraxes galega e lusófona, respectivamente. Asimesmo, a organización manterá o tradicional premio do público, outorgado mediante votación popular. Tamén de xeito pioneiro, e dada a tradición e calidade deste xénero cinematográfico, o festival promove a creación dunha sección exclusiva adicada á animación, concedéndolle un galardón propio e diferenciado.

A modo de marco de encontro e con obxectivo de dotar de contido ao festival, a organización ten programadas unha serie de actividades paralelas. Entre elas destaca a master class do director coruñés, Alberto Vázquez, galardoado con dous premios Goya na presente edición. Está prevista unha homenaxe ás Xornadas de cinema desenvolvidas desde 1984 no Carballiño, denominadas XOCIVIGA, e consideradas como pioneiras do audiovisual galego moderno. A idea desta iniciativa é reflexionar sobre o paradigma e as tendencias do sector na actualidade, recuperando o espírito deses encontros e servindo de pulo ao cinema galego.

Como efeméride do 120 aniversario da primeira proxección audiovisual na cidade de Vigo, no teatro-circo Tamberlic o 29 de abril de 1897, está prevista unha rememoración desa cita na que Vigo «respirou cine»; exercendo deste xeito unha labor de salvagarda histórica cun pase das pezas orixinais restauradas, cedidas polo Instituto Lumière de Lyon. Está prevista a participación das Escolas de audiovisual de Vigo e Pontevedra así como o descubrimento dunga praca conmemorativa. Esta edición manterá a tradicional actividade, Cine miúdo, no que participarán máis de 500 escolares de Educación Primaria que asistirán a proxeccións de cinema clásico, musicalizadas pola agrupación viguesa, Trío Caspervek. Resulta fundamental, na presente convocatoria, a vontade de implicación da área académica e estudantil para dar a coñecer á canteira e futuro do sector. Para rematar, o Marco de Vigo acollerá, ao solpor, unha sesión de cinema e concerto, que o ano pasado gozou de grande aceptación entre os asistentes.

The following two tabs change content below.
"Un hombre con una idea nueva es un loco hasta que la idea triunfa."
Etiquetado ,,,,,,

Deja un comentario

Tu dirección de correo electrónico no será publicada. Los campos obligatorios están marcados con *